Thursday, June 4, 2009

صنعة

لن اسعى بأي حال من الأحوال لمحاولة تحليل خطاب الرئيس الأمريكي باراك أوباما في القاهرة فأنا ممن يؤمنون بضرورة إعطاء العيش لخبازه...وأنا بالقطع لست ممن يجيدون خبز التحليلات وعجن النظريات... سأتوقف فقط عند نقطة واحدة: أوباما نفسه


يدرك الرئيس الأمريكي والمؤسسة التي تقف خلفه لتساعده على الحكم أن سر جاذبية هذا الرجل وشعبيته اللامتناهية لا يتعلق كثيرا بما يقوله ولكن بالكيفية التي يقوله بها. تلك الجبهة المرفوعة بكبرياء، العينان الحادتان اللتان تفرضان الثقة والاطمئنان على الناظر فيهما... عظام الوجنة التي ليست بارزة بقدر ما هي سلسة تتيح لجلد الوجنة أن يرسم خطوطا دقيقة على وجه الرجل لإبراز حدة العينين واتساع الابتسامة من هذا الفم العريض المزين بصفين من اللؤلؤ. الأصابع الطويلة الناعمة التي تتسلل بنعومة إلى الدماغ لتمسك بكل خيوطها وتحركها كما تشاء دون أن تشعر أنك سلبت القدرة على الحركة والتفكير المستقل. لا امتدح أوباما ولا أذمه لكنها مجموعة من الملاحظات التي جالت بذهني على فترات متباينة جعلتني على يقين بأن هذا الرجل شارب صنعة السياسة من بز السيدة والدته... يعرف تماما من أين تؤكل الكتف ومن أين يلحس الدماغ



الخطبة كاملة على موقع يوتيوب





ولمن يحب التحليلات والمقارنات التاريخية السياسية ... رابط آخر لخطاب السادات في القدس




4 comments:

u3m said...

لا اتفق معك فى وصفك لوجه اوباما .. مش عارف ليه كل ما اشوفه احس انه عنده فشل كلوى او مرض كبدى مزمن !!!
لكن منكرش ان الراجل له كاريزما مخيفة

الكونتيسة الحافية said...

u3m
مش متفق معايا في انطباعي عن تأثير ملامحه ولا عن وصف القسمات نفسها؟

الكاريزما مخيفة لانه واعيلها ولانه عارف يستخدمها إزاي... بس خطورة أوباما من وجهة نظري ان محدش عنده فكرة خالص عن اللي في دماغه واللي عايز يعمله.. عينيه حادة وقوية بس هو بيعرف يسيطر عليها كويس وميخليهاش تفضحه... أعتقد انه بذكائه وبدراسته للتاريخ استوعب إن المشاكل اللي بتتخلق في منطقة معينة بهدف السيطرة عليها لا يمكن أن تخضع للتوجيه طيلة الوقت... هييجي وقت وتخرج فيه عن نطاق السيطرة وهتبقى مساوئ المنطقة دي مهما كانت خيراتها أكتر من منافعها... أعتقد إن أوباما رمى طوبة الشرق الأوسط وإن كلامه فعليا في الخطاب كان موجه لناس تانية مش للعرب ولا حتى لإسرائيل

u3m said...

وصفك لقسمات وجهه سليم بس لو اضفتيله انطباعى عن لون بشرته كان الانطباع العام عن تأثير ملامحه هيتغير كتير

لانى الصراحة شايف انه مش ابيض ولا اسود ولا قمحى ولا اصفر او احمر
بل هو قمحى مصفر .. سقيم من الآخر يعنى
مش عارف .. يمكن انا اللى عينيا عاوزة
ظبط CYMK

نيجى بأه لكلامك عن دماغ وخطبة اوباما - بالرغم من انك قلتى فى اول تدوينتك انك مش هتحللى كلامه :o)
انا كان عندى تعقيب جامد اوى يتضمن عبارات زى ... علم ادارة الازمات ونظريات الاحتمالات والفوضى المنظمة والشادو جوفرنمنت والدمية السمراء والحاجة للتغيير وو .. وكده يعنى ..بس لقيت انى بكده هاخرج عن مضمون التدوينة نفسها

الكونتيسة الحافية said...

u3m
فهمت قصدك بس بشكل شخصي أنا لما باجي أبص على أوباما مش بشوف لون البشرة ده خالص... أنا بركز أكتر على حركة جسمه والطريقة اللي بيستخدم بيها ده أثناء الحوار علشان بهدوء وذكاء شديدين علشان ياكل دماغك...

أعتقد إني لو كنت هتكلم بشكل تحليلي كنت هركز على نظرية إدارة الازمات تحديدا وتطبيقها في المنطقة من خلال شخصية أوباما ومحاولاته لعمل نوع من التوازن بين دماغه المستقلة وأجندة المؤسسة الحاكمة في الولايات المتحدة.

عندي فضول اقرا تعقيبك الجامد
:))